Kuch ajab shan se logon may raha karate the

Kuch ajab shan se logon may raha karate the
Ham khafa rah ke bhi apas may mila karate the

Itani tahazib rah o rasm to baqi thi ki wo
Lakh ranjish sahi wada to wafa karate the

Us ne pucha tha kai bar magar kya kahiye
Ham mizajan hi pareshan raha karate the

Khatm tha ham pe mohabbat ka tamasha goya
Ruh aur jism ko har roz juda karate the

Zindagi ham se tere naz uthaye na gaye
Sans lene ki faqat rasm ada karate the

Ham baras parate the `shaz` apani hi tanhai par
Abr ki tarah kisi dar se utha karate the....